“The beautiful intersectionalities”: Shy-Anne’s Narrative in Northern Ojibway

By: Shy-Anne Bartlett

Shy-Anne Bartlett

Education Collaborator

Shy-Anne is an educator, musician, environmentalist and humanitarian. She lives off the land as much as she can for her and her family. Shy-Anne worked in education as a teacher for 18 years prior to taking on the role of Manager of Indigenous Education for SGGDB. She is working towards social justice through her work daily work and through her music. When she is not working, she is a mother, gardener and lover of all life, and does her best to live life in a good way while walking the dual path of Anishinaabe way of life and colonial life.

ᑲᐅᔑᐲᐦᐃᑫᒡᐅᑐᔑᐲᐦᐃᑲᓐ

ᐁᑲ ᐁ ᔑᔭᔭᓐ ᒋᑲᑐᔭᓐ ᑫᑯᓐ, ᑭᔥᐱᓐ ᑕᔥ ᐁᑯᒋᑐᔭᓐ ᒋᑲᓇᐘᐸᓐᑕᒪᓐ ᐯᔑᒃ ᑲᓇᐘᐸᓐᒋᑫᐏᓐ ᐃᐦᐃᒪ ᑲᓇᐸᐸᓐᒋᑲᑌᑭᓐ ᑲᓇᐘᐸᓐᒋᑫᐏᓇᓐ ᐅᓐᒋ ᑭᑭᓄᒪᑯᐏᓐ ᑲᐅᓐᒋᑭᑫᓐᑕᑯᒃ ᐅᓐᒋ ᐁᑐᐘᑉᒪᓐᒃ ᑲᐑᑕᓄᑭᒪᑿ ᑲᑭᐅᔑᑐᐘᒡ, ᑳᐏᓐ ᑮᑐᑕᓐᓰᓐ, ᐁᓇᑭᔥᑲᑏᒪᑲᑭᓐ᙮ ᐅᐦᐅᒪ ᑲᐃᔑᓃᐸᐏᔭᓐ ᐊᐑᔭ ᑲᐃᔑᓂᓯᑕᐏᓈᓱᒡ ᐊᓂᔑᓇᐯᑵ (ᐊᓂᔑᓇᐯᑵ) ᒦᓇ ᐁᑭ ᐅᒻᐱᑭᐦᐊᑲᓀᒡ ᐅᐦᐅᐍ, ᑲᐃᔑ ᒪᒥᑐᓀᓐᑕᒪᓐ ᑫᑯᓇᓐ ᐁᑮᓂᑿᓂᓭᑭᓐ, ᒦᓇ ᐁᑲ ᒋᑮ ᐸᑫᓇᒪᓇᓐ ᑫᑯᓇᓐ ᑲᐃᔑ ᐸᔭᑌ ᐘᐸᓐᑕᒪᓐ ᐁᓴᑭᓯᓐᑭᓐ ᐃᓂᐍᓂᐘᓐ ᑲᑲᓇᐘᐸᓐᒋᑲᑌᑭᓐ ᒦᓇ ᒋᐑᒋᐏᑎᔭᓐᒃ ᒥᓇ ᒋᐑᒋᐦᐃᑎᔭᓐᒃ᙮ ᐁᑯᑕᔥ, ᐊᑭᓐᑕᒪᓐ ᐅᐦᐅᐍ ᑲᐃᔑᑎᐸᒋᒧᔭᓐ, ᑲᒥᑲᓇᓐ ᐃᓂᐍᓂᐘᓐ ᑲᑲᓇᐘᐸᓐᒋᑲᑌᑭᓐ ᐁᓂ ᐑᒋᐑᑎᒪᑲᑭᓐ, ᐁᑲ ᒋᐘᐸᓐᑕᒪᓐ ᐊᓐᑎᓀᑫ ᐍᓐᒋᒪᒋᑕᓂᐘᓐᒃ ᒥᓇ ᐁᔑᑭᔑᐱᓭᒃ᙮ ᒦᐦᐅᐍ ᑫᑯᓐ ᐁᔑᑭᑫᓐᑕᒪᓐ ᑲᐃᓯᓭᒃ ᑲᐃᔑᒪᒥᑐᓀᓐᑕᒧᐘᒡ ᐊᓂᔑᓇᐯᒃ – ᑲᑭᓇ ᑫᑯᓐ ᐑᒋᐏᑎᒪᑲᓐ ᒦᓇ ᓴᑭᓯᓄᓐ, ᒦᓇ ᒋᑭᒋᓀᓐᑕᒪᓂᓐ ᒥᓇ ᒋᓂᓯᑐᑕᒪᓐ ᐯᔑᒃᑫᑯᓐ, ᐃᓯᓭ ᒋᑭᑫᓐᑕᒪᓐ ᒦᓇ ᒋᓂᓯᑐᑕᒪᓐ ᐁᑯᓀᓐ ᓴᑭᓯᓐᑭᓐ᙮ ᑮᔅᐱᓐ ᑐᑕᒪᓐ, ᑌᐻ ᑭᓇᓇᑯᒧᒥᓐ, ᑭᑭᒋᓀᓐᑕᒥᓐ ᒦᓇ ᑭᑭᑫᓐᑕᒥᓐ ᐁᒥᓌᔑᑭᓐ ᑲᓴᑭᓯᑭᓐ ᐃᓂᐍᓂᐘᓐ ᑭᑫᓐᒋᑫᐏᓇᓐ ᑫᑐᒋᑲᑌᑭᓐ᙮

ᒦᑵᒡ,

ᔕᔾ ᐋᓐ

ᐁᑯᓀᓐ ᓃᔓ ᐅᔥᑭᓐᔑᒃ ᐘᐱᐏᓐ ᑲᐃᒋᑲᑌᒃ? ᑲᓃᑲᓇᑌᒃ ᒥᓯᐍ ᑲᓇᐘᐸᓐᒋᑫᐏᓐ, ᑲᑭᐅᓇᓐᑭᓐᑕᓐᒃ ᒥᒃᒪ ᑭᒋᔭᐦᐊ ᐊᓪᐳᕐᑦ ᒫᕐᔕᓪ, ᐅᓐᒋ ᐁᑐᐘᑉᒪᓐᒃ (ᑲᐃᔑ ᐊᓂᑲᓄᒋᑲᑌᒃ ᓃᔓ ᐅᔥᑭᓐᔑᒃ ᐘᐱᐏᓐ), “᙮᙮᙮ᐁᐃᔑᐏᓐᒋᑲᑌᒃ ᐁᐅᓐᒋᑭᑫᓐᑕᓱᓇᓂᐘᓐᒃ ᐁᐘᐱᔭᓐ ᐯᔑᒃ ᐅᔥᑭᓐᔑᒃ ᐃᓂᐍᓂᐘᓐ ᑲᒪᔥᑲᐘᑭᓐ ᐅᓐᒋ ᐊᓂᔑᓇᐯ ᑭᑫᓐᒋᑫᐏᓇᓐ ᒦᓇ ᑲᐃᓯᓭᑭᓐ ᑲᑭᑫᓐᒋᑲᓂᐘᓐᒃ, ᒦᓇ ᑯᑕᒃ ᑭᔥᑭᓐᔑᒃ ᐅᓐᒋ ᐃᓂᐍᓂᐘᓐᒃ ᑲᒪᔥᑲᐘᑭᓐ ᐅᓐᒋ ᐍᒥᒋᑯᔑᐏᓐ ᑭᑫᓐᒋᑫᐏᓇᓐ ᒦᓇ ᑲᐃᓯᓭᑭᓐ ᑲᑭᑫᓐᒋᑲᓂᐘᓐᒃ ᙮᙮᙮ ᒦᓇ ᒋᑭᑫᓐᒋᑫᔭᓐ ᒋᐊᐸᒋᑐᔭᓐ ᓂᔑᓐ ᑭᔥᑭᓐᔑᑯᓐ ᒪᒪᐤ, ᒋᐅᓐᒋᒥᓄᓭᐘᒡ ᑲᑭᓇ ᐊᐑᔭᒃ᙮” (Institute for Integrative Science and Health)᙮ ᐅᐦᐅᒪ ᐯᐸᓄᓐᒃ, ᑲᓇᑲᒋᑐᒥᓐ ᑲᒥᔑᓇᑭᓐ ᑲᓇᐸᐸᓐᒋᑲᑌᑭᓐ ᑲᓇᐘᐸᓐᒋᑫᐏᓇᓐ ᐅᓐᒋ ᐁᑐᐘᑉᒪᓐᒃ, ᑲᔦᒪ ᓂᔓ ᐅᔥᑭᔑᑲᓐ ᐘᐱᐏᓐ᙮

ᐯᔑᒃ ᑲᑲᓇᐘᐸᓐᒋᑲᑌᒃ ᐃᐦᐃᐍ ᒋᑲᔥᑭᑐᔭᓐ ᒋᑮᓂᓯᑐᑕᒪᓐ ᑲᑐᑕᒪᓐᑭᓐ ᓄᑯᒻ ᑫᑯᓐ ᑲᑭᔑᑲᒃ ᑲᓇᑭᔥᑲᒥᓐ ᐃᓯᓭᐏᓇᓐ ᐅᐍᑎ ᓃᑲᓐ᙮ ᒋᑲᔥᑭᑐᔭᓐᒃ ᒋᐘᐸᓐᑕᒪᓐᒃ ᑫᑯᓇᓐ ᒦᓇ ᒋᑮᑐᑕᒪᓐᑭᓐ ᑲᐃᔑᓂᔕᑭᓐ ᐘᐱᐏᓇᓐ ᑕᐃᓯᓭ ᒋ ᐃᓯᓭᑭᓐ ᐊᓂᓐ ᑫᐃᔑᒪᒐᔭᓐᒃ ᓂᑲᓂᓐᒃ ᐅᐍᑎ ᓃᑲᓐ᙮ ᑮᔥᐱᓐ ᐃᔑᐅᓀᓐᑕᒪᓐᒃ ᒋᐅᓐᒋ ᐘᐱᔭᓐᒃ ᐸᑲᓐ ᐘᐱᐏᓂᓐᒃ, ᑕᑭᓯᓭ ᒋᐅᓐᒋ ᒥᓄᓭᒃ ᐅᓐᒋ ᒥᓯᐍ ᐊᐦᑭᐏᓐ ᒦᓇ ᑫᓂᐱᒪᑎᓯᐘᒡ ᑲᑭᓇ ᑭᑎᓇᐍᒪᑲᓂᓇᓐ᙮ ᒥᔑᓐ ᐊᓂᔑᓇᐯᒃ ᐃᓇᑎᓯᐏᓇᓐ ᐅᐦᐅᒪ ᒥᑭᓇᑯᑮᓐᒃ (ᑭᐍᑎᓄᓐᒃ ᐊᒣᕆᑲ) ᐁᒪᔥᑲᐘᑌᒃ ᑲᐃᔑᐑᒋᑐᔭᓐᒃ ᐊᐦᑭᐏᓐ᙮ ᓃᓐ, ᐅᓐᒋ ᑲ ᐊᓂᔑᓇᐯᑵᐏᔭᓐ (ᐊᓂᔑᓇᐯᒧᐏᓐ ᐅᓐᒋ ᐊᓂᔑᓇᐯᑵ), ᑌᐻᑕᓇᓐ ᒦᓇ ᓂᒦᑵᓐᑕᓇᓐ ᐁᓴᑭᔑᓇᓐ ᐊᐦᑮᑲᓐᒃ᙮ ᑭᑐᑕᒧᐏᓂᓇᓐ ᓄᑯᒻ ᑲᑮᔑᑲᒃ ᒦᓇ ᐅᓇᑯ ᑭᑐᓇᑭᓐᑕᒥᓐ ᑫᐃᔑᓇᑯᒃ ᐊᐦᑭᐏᓐ ᒦᓇ ᑫᓂᐱᒪᑎᓯᐘᒡ ᓃᑲᓐ᙮ ᐊᐱ ᓇᑲᑕᐍᓐᑕᒪᓐ ᓃᑲᓂᓐᒃ, ᐃᓯᓭᒃ ᑲᔦ ᒋᓇᑲᒋᑐᔭᓐᒃ ᑭᑐᑕᒥᓇᓐᒃ ᑫᐃᓯᓭᒃ ᒦᓇ ᑫᐃᔑᓇᑯᒃ ᑭᓃᑲᓂᒥᓇᓐᒃ᙮ ᐊᐱ ᓇᑲᒋᑐᔭᓐᒃ ᐅᑕᓇᓐᒃ, ᐁᔥᑲᒻ ᑭᓇᑲᑕᐍᓐᑕᒥᓐ ᐍᔥᑲᒡ ᑭᑭᓄᒪᑎᐏᓇᓐ, ᐅᑭᒪᑫᐏᓇᓐ ᒦᓇ ᑲᑭᐅᑭᒪᑲᓐᒋᑲᑌᒃ ᑲᓇᑕ, ᐃᓂᐍᓂᐘᓐ ᑲᒣᒣᔾᑭᓭᑭᓐ ᐅᑕᓇᒋᒧᐏᓇᓐ ᐍᔥᑲᒡ ᐍᒥᒋᑯᔑᐘᒃ ᒦᓇ ᐊᓂᔑᓇᐯᒃ ᑲᑭᐱᑐᑕᒧᐘᒡ ᐅᑕᓇᓐᒃ 500 ᑕᓱᐊᐦᑭᐏᓐ᙮

ᔕᑯᒡ, ᑯᑕᑭᔭᓐ ᐅᑕᓇᒪᓐ ᓇᓐᑕᐍᓐᑕᑯᓄᓐ ᒋᑭᓇᑲᑕᐍᓐᒋᑲᑌᑭᓐ᙮ ᑮᓇᐏᓐᑦ ᐊᓂᔑᓇᐯᒃ ᐃᓇᑲᓀᓯᐏᓇᓐ ᒦᓇ ᑲᐃᓇᑎᓯᔭᓐᒃ ᒥᔑᓄᐊᐦᑭᐏᓐ ᐅᐦᐅᒪ ᑭᑕᔭᒥᓐ ᒦᓇ ᑭᑕᔭᒥᓐ ᑭᑫᓐᑕᒪᐏᓇᓐ ᐁᓴᓇᑲᑭᓐ ᒦᓇ ᐁᒣᒣᔾᑭᓇᑯᑭᓐ ᐅᐦᐅᒪ ᑲᒥᔑᓄᔭᓐᒃ ᐊᓂᔑᓇᐯᒃ ᒥᓯᐍ ᒥᑭᓇᑯᐊᐦᑭᓐᒃ᙮ ᑭᑭᐅᔑᑐᒥᓐ ᑭᓇᐏᓐᑦ ᑫᐃᔑᑭᑫᓐᒋᑫᔭᓐᒃ ᒦᓇ ᑭᐱᒪᑎᓯᐏᓂᓇᓐ᙮ (ᑲᐏᓐ ᑲᑐᑕᓯᓐ ᒋᐊᐸᒋᑐᔭᓐ ᐍᒥᒋᑯᔑᐏᓐ ᐃᑭᑐᐏᓇᓐ ᑎᓄᑲᓐ “ᐃᔑᑭᑫᓐᑕᓱᐏᓐ” ᐁᑲ ᐃᓂᐍᓂᐘᓐ ᑭᓇᐏᓐᑦ ᑭᑎᑭᑐᐏᓂᓇᓐ ᒦᓇ ᐁᑲ ᒥᓯᐍ ᐁᑲᔥᑭᓂᑲᑌᑭᓐ ᑭᑐᑕᒧᐏᓂᓇᓐ᙮) ᑭᐱᑐᒥᓐ ᐁᐘᑌᑭᓐ ᑫᑯᓇᓐ ᑲᓂ ᐅᓐᒋᐅᓇᑌᑭᓐ ᑭᑭᑫᓐᒋᑫᐏᓂᓇᓐ ᑲᐃᓇᑌᑭᓐ, ᑲᐸᑭᑎᓂᑫᔭᓐᒃ ᐅᓐᒋ ᐲᐘᐱᑯᑫᐏᓇᓐ (ᐃᓂᐍᓂᐘᓐ ᑎᓄᑲᓐ ᐊᓂᓐᑕ ᑲᑭᓯᓭᑭᓐ ᒋᒪᓇᓐ ᒦᓇ ᐊᐦᑭᒪᒃ), ᑲᓂᓯᑐᑕᒪᓐᒃ ᐊᐦᑭᓐ ᒦᓇ ᑲᓴᑭᔑᓇᓐᒃ ᐊᐦᑭᑲᓐᒃ ᑲᐅᓐᒋ ᐊᐸᒋᑐᔭᓐᑭᓐ ᑎᓄᑲᓐ ᒪᔥᑭᑭᑫᐏᓐ, ᐁᐅᓐᒋ ᑲᔥᑭᐦᐅᔭᓐ ᒥᓯᐍ ᑐᑕᒧᐏᓇᓐ — ᓂᑲᒧᐏᓐ, ᓂᒥᐏᓐ, ᒪᓯᓇᐱᐦᐃᑫᐏᓐ, ᑎᐸᒋᒧᐏᓇᓐ, ᒦᓇ ᒥᔑᓐ ᑯᑕᑭᔭᓐ ᑐᑕᒧᐏᓇᓐ ᐁᑲ ᐁᓂᓯᑕᐏᓂᑲᑌᑭᓐ ᐁᐸᑭᑎᓂᑫᐘᒡ ᐊᓂᔑᓇᐯᒃ᙮

***

ᓂᐏᐏᓐᑕᓐ ᐅᐦᐅᐍ ᑭᑭᓄᒪᑫᐏᓐ ᑲᑭᐏᓐᑕᓐᒃ ᐲᑎᑯᓐᒃ ᓂᔑᓇᐯᒃ ᑭᒋᔭᐦᐊ, ᓯᓐᑎ ᐱᔓᕐ, ᐁᑭᑲᑲᓄᓇᓐᒡ ᑲᐃᔑᒪᒪᐤᐱᓇᓂᐘᓐᒃ ᐁᐊᑲᓯᓄᐘᒡ ᑭᑭᓄᒪᑫᒃ᙮ ᑕᔑᓐᑕᒥᓇᐸᓐ ᐊᓂᓐ ᑫᑭᑐᑕᓐᒃ ᐊᐏᔭ ᒋᑭᐱᒧᓴᑕᓐᒃ ᑲᐃᔑᓂᔕᑭᓐ ᐃᓇᑲᓀᓯᐏᓇᓐ ᒦᓇ ᒋᑭᒋᓀᓐᑕᒪᓐᒃ ᑲᐃᔑᓂᔕᑭᓐ᙮ ᑭᒋᔭᐦᐊ ᑭ ᐃᑭᑐ, “ᑭᑕᔭᓇᓐ ᓂᔑᓐ ᒋᒪᓇᓐ, ᑲᑐᑕᓐ ᐯᔑᒃ ᑭᓯᑦ ᒋᐊᑐᔭᓐ ᐃᐦᐃᒪ ᒋᒪᓂᓐᒃ ᑲᐃᔑᓂᔕᑭᓐ᙮” ᑲᓇᓐᑐᑕᓐᒃ ᑭᑲᑵᑌ, “ᑭᔥᐱᓐ ᐊᔭᔭᓐ ᑭᓯᑕᓐ ᐯᐯᔑᒃ ᐃᐦᐃᒪ ᑲᐃᔑᓂᔕᑭᓐ ᒋᒪᓇᓐ, ᑲᑿᓇᐱᔥᑲ ᒦᓇ ᒋᐸᑯᐱᑯᒋᓇᓐ ᓂᐱᑲᓐᒃ, ᒦᓇ ᒋᒪᒋᐊᐳᑌᑭᓐ ᐃᓂᐍᓂᐘᓐ ᒋᒪᓇᓐ ᐯᐸᑲᓐ, ᒦᓇ ᒋᓂᐱᐏᔭᓐ ᒦᓇ ᐁᑲ ᒋᑭ ᐊᑿᓯᔭᓐ ᐃᐦᐃᒪ ᓂᐱᑲᓐᒃ᙮” ᑭᒋᔭᐦᐊ ᑭᔓᐏᓐᑵᑕ ᒦᓇ ᑭᓇᑵᑕᒻ ᐁᐘᓯᒐᐱᓱᒡ, “ᑫᒋᓐ, ᔕᑯᒡ ᑲᐏᓐ ᑭᔥᐱᓐ ᐁᑲ ᐁᑲᑭᑕᐍᓐᑕᒪᓐ ᒋᑭ ᓂᔑ ᑭᒋᐘᐱᑐᔭᓂᓐ ᒋᒪᓇᓐ ᓂᑕᒻ᙮” ᑭᐸᐱᐘᒃ ᐃᐦᐃᒪ ᑲᐅᑯ ᒪᒪᐤᐱᐘᒡ ᐸᑫᓴᑲᓐᒃ᙮

ᐃᐦᐃᐍ ᐊᐍᒋᑲᓐ ᒪᔅᑲᐏᓯᓐ ᒦᓇ ᑌᐻ ᑭᑭᐱᒋᒥᓐ ᒦᓇ ᑭᓇᑲᑕᐍᓐᑕᒥᓐ᙮ ᐊᓂᓀᔑᐏᓐᒋᑫᒪᑲᒃ ᐃᓂᐍᓂᐘᓐ ᓃᔑᓐ ᑭᓯᑕᔭᓐ ᒋᐊᑐᔭᓐ ᑲᐃᔑᐯᐸᑲᓇᑭᓐ ᒌᒪᓇᓐ, ᑲᔦᒪ ᒋᐱᒧᓴᑕᒪᓐ ᑲᐃᔑᓂᔕᑭᓐ ᐃᓇᑲᓀᓯᐏᓇᓐ ᑕᐱᔥᑯᒡ? ᒋᐘᐸᓐᑕᒪᓂᓐ ᑲᐃᔑᓂᔕᑭᓐ ᐍᒥᒋᑯᔑᐏᓐ ᒦᓇ ᐊᓂᔑᓇᐯ ᐅᔥᑭᓐᔑᑯᓐ? ᐁᐃᓀᓐᑕᑯᒡ ᐁᐍᓐᑕᒃ ᔕᑯᒡ ᑲᐏᓐ ᒋᐍᓐᑕᒃ ᒋᑭᑐᒋᑲᑌᒃ᙮

***

ᒥᔑᓇᓄᓐ ᐃᓂᐍᓂᐘᓐ ᑲᓇᐸᐸᓐᒋᑲᑌᑭᓐ ᑲᑲᓇᐘᐸᑌᑭᓐ, ᑲᔦᒪ ᑫᑯᓇᓐ ᒋᓇᑲᑕᐍᓐᑕᒪᓐ ᒋᑭᐱᒧᓭᔭᓐ ᒥᑲᓇᓐᒃ ᑲᐃᔑ ᓂᔓ ᐅᔥᑭᓐᔑᑯᓐ ᐘᐱᐏᓂᓐᒃ, ᑲᐃᓯᓭᑭᓐ ᐍᒥᒋᑯᔑᐏᓐ ᒦᓇ ᐊᓂᔑᓇᐯ ᑲᑐᒋᑲᑌᑭᓐ ᒋᐘᐱᓇᓂᐘᓐᒃ, ᒋᑭᑫᓐᒋᑫᔭᓐ ᒦᓇ ᒋᔑᔭᔭᓐ ᐁᑭᒋ ᒪᔭᑫᓐᑕᑯᑭᓐ᙮ ᐁᑭ ᐊᑭᓐᑕᒪᓐ ᐳᕃᑎᓐᒃ ᓹᑦᒃᕌᔅ (Wall Kimmerer, 2013), ᐊᐏᔭ ᑕᑭᒪᒋᑕ ᒋᐊᓂ ᐘᐸᓐᑕᓐᒃ ᐊᐦᑭᐏᓇᓐ ᒋᓂᔢᔦᑭ ᑲᓇᐘᐸᓐᑕᓐᒃ ᑲᐃᔑᓂᔕᑭᓐ ᒦᓇ ᒋᐸᑭᑎᓇᒪᓂᓐ ᑲᐃᔑ ᒪᔥᑲᐏᒪᑲᑭᓐ ᒋᐏᒋᐦᐃᐍᒪᑲᑭᓐ᙮ ᐊᓂᔑᓇᐯ ᑲᐃᔑᐘᐸᓐᑕᓐᒃ ᐅᓐᒋ ᐊᐦᑭᐏᓐ ᐁᒪᒪᐏᓭᑭᓐ ᒦᓇ ᐁᐑᒋᐏᑎᒪᑲᒃ – ᐁᑎᐱᔥᑯᒋ ᑲᓇᐘᐸᓐᑕᒪᓐᒃ ᑲᑭᓇ ᒪᔥᑯᔑᓐ, ᐊᐑᐊᔒᔥ ᒦᓇ ᒪᓂᒍᔕᒃ ᐅᐦᐅᒪ ᒥᓯᐍ ᐊᐦᑭᐏᓂᓐᒃ; ᑭᐑᒋᑭᑫᓐᒋᑫᒪᒥᓐ ᒦᓇ ᐁᑭᑭᓄᒪᑯᔭᓐᒃ ᑎᓄᑲᓐ ᑭᐏᒋᑵᐏᓯᓇᓐ ᒦᓇ ᑭᒥᓭᓐᓯᓇᓇᒃ᙮ ᐁᓇᑲᒋᒋᑲᑌᒃ ᐊᐦᑭᐏᓐ ᐅᓐᒋ ᐍᒥᒋᑯᔑ ᑲᐃᔑᑲᓇᐘᐸᓐᑕᓐᒃ, ᑭᑎᔑᑲᓇᐘᐸᓐᑕᒥᓐ ᒋᐊᐸᒋᑐᔭᓐ ᒋᑭᐏᒋᐦᐃᑯᔭᓐᒃ ᑫᑯᓇᓐ ᑲᓇᓐᑕᐍᓐᑕᒪᑭᓐ᙮ ᐅᐦᐅᐍ ᑲᐃᔑᓂᓯᑐᒋᑲᑌᒃ ᑲᓇᑲᑕᐍᓐᒋᑲᑌᒃ ᐊᐦᑭᐏᓇᓐ ᑲᐃᔑ ᓇᑲ ᑲᓇᐘᐸᓐᒋᑲᑌᒃ ᐊᐦᑭᐏᓇᓐ ᐁᑭᒋᓀᓐᑕᑯᒃ ᑲᑲᓇᐘᐸᓐᒋᑲᑌᑭᓐ ᒋᑭᓂᓯᑐᒋᑲᑌᑫᒃ ᐁᑐᐘᑉᒪᓐᒃ᙮ ᐁᐯᔑᓇᑯᑭᓐ ᐃᓂᐍᓂᐘᓐ ᑲᑲᓇᐘᐸᓐᒋᑲᑌᑭᓐ ᐅᓐᒋ ᐊᓂᔑᓇᐯ ᑭᑫᓐᑕᒪᐏᓇᓐ ᐁᒪᔥᑲᐘᑌᑭᓐ ᐁᐏᒋᑐᒪᑲᑭᓐ ᑲᑭᓇ ᑲᐱᒪᑎᓯᒪᑲᑭᓐ: ᒪᔥᑯᔑᓐ, ᐊᐏᔭᔑᔥ, ᑭᓀᐱᒃ, ᐊᓯᓐ, ᐸᑭᑕᓇᒧᒋᑲᓐ, ᓂᐱ ᙮᙮᙮ ᑲᑭᓇ ᑲᐱᒪᑎᓯᒪᑲᒃ ᒦᓇ ᑲᐅᓐᒋᓯᓭᒃ ᐱᒪᑎᓯᐏᓐ᙮ ᑲᑭᓇ ᐱᒪᑎᓯᐏᓐ ᒦᓇ ᑲᐅᓐᒋᓯᓭᒃ ᐊᐦᑭᐏᓐ ᑲᐃᔑᓇᑯᑭᓐ ᒋᐅᓐᒋ ᐱᒪᑎᓯᒪᑲᒃ ᑲᑭᓇ ᑫᑯᓐ ᑲᐅᓐᒋᑎᐯᓐᑕᑯᑭᓐ᙮ ᐅᓄᐍᓂᐘᓐ ᑲᔦ ᐱᒪᑎᓯᐏᓇᓐ ᑲᑲᐃᓀᓐᒋᑲᑌᑭᓐ ᑎᓄᑲᓐ ᓀᐘᓐᒃ ᑲᔦᒪ ᓴᑭᒣ, ᒦᓇ ᑎᐱᓇᐍ ᒦᓇ ᑭᑕᔑᑫᐏᓂᓇᓐ ᐏᒋᐏᑎᐏᓇᓐ ᐅᓐᒋ ᐅᓄᐍᓂᐘᓐ ᑲᑭᓇ ᐱᒪᑎᓯᐏᓇᓐ᙮

ᐏᒋᐏᑎᐏᓐ ᑭᒋᓀᓐᑕᑯᓐ ᒋᐊᒋᑲᑌᒃ ᐊᓂᔑᓇᐯ ᐘᐸᓐᒋᑫᐏᓐ ᐃᐦᐃᒪ ᐁᑐᐘᑉᒪᓐᒃ, ᒦᓇ ᒋᒥᓇᑲᓀᒡ ᐊᐦᑭᐏᓐ ᒦᓇ ᑲᑭᓇ ᑲᐅᔑᑐᒋᓐ ᒋᑭᒋᓀᓐᒋᑲᑌᒃ ᑲᔦ ᒋᒪᔭᒣᓐᒋᑲᑌᒃ ᑲᐃᔑᓇᓐᑕᐍᓐᑕᑯᒃ᙮ ᐊᓂᔑᓇᐯ ᐘᐸᓐᒋᑫᐏᓐ ᐅᓐᒋ ᐏᒋᐏᑎᐏᓇᓐ ᐁᔥᑲᒻ ᐃᓯᓭ ᐁᒪᔭᑭᓭᑭᓐ ᐍᒥᒋᑯᔑ ᑲᐃᔑᐘᐸᓐᑕᓐᒃ᙮ ᐃᐦᐃᒪ ᐍᒥᒋᑯᔑ ᑭᑭᓄᒪᑫᐏᓇᓐ, ᑭᓇᑲᑕᐍᓐᑕᒥᓐ ᑲᑭᓇ ᑫᑯᓐ ᐅᓐᒋ ᐃᔑᓇᑯᒋᑫᐏᓐ, ᓂᐲᐏᒋᑫᐏᓇᓐ, ᒋᓇᑲᑕᐍᓐᒋᑲᑌᑭᓐ ᐊᓐᑎᓀᑫ ᐁᔑᐏᒋᐦᐃᐍᒪᑲᑭᓐ, ᑲᐃᔑᓇᑯᑭᓐ ᒦᓇ ᐃᔑᓭᐏᓇᓐ (ᐱᒪᔑᑲᐏᒋᑫᐏᓐ, ᐏᔭᐤ ᑐᑮᐏᓐ, ᐃᑲᑕᒃ, ᐊᓂᐱᔥ, ᐘᑯᓃᓐ᙮᙮᙮ᑯᑕᑮᔭᓐ ᒦᓇ), ᔕᑯᒡ, ᐊᓂᔑᓇᐯ ᑭᑭᓄᒪᑫᐏᓐ/ᐃᔑᒪᒥᑐᓀᓐᒋᑫᐏᓐ, ᑭᑎᔑᓇᑲᑕᐍᓐᑕᒥᓐ ᑲᑭᓇ ᑫᑯᓐ ᐁᒥᓯᐍᓯᓐᑭᓐ᙮ ᐁᑲᓇᐘᐸᓐᒋᑲᑌᒃ ᒪᔥᑭᑭᐤ ᑭᑫᓐᒋᑫᐏᓇᓐ ᐁᒥᓐᓯᐍᔭᒃ, ᐃᐦᐃᐍ ᐁᒥᓐᓯᐍᑲᓇᐘᐸᓐᒋᑲᑌᒃ 4 ᑫᑯᓇᓐ ᐁᐅᓐᒋ ᒥᓯᐍᔭᒃ – ᐊᐦᒐᑯᐏᓐ, ᐃᓀᓐᑕᒧᐏᓐ, ᐏᔭᐤ ᐅᐏᓐ, ᒥᑐᓀᓐᑕᒧᐏᓐ – ᐁᑕᐱᔥᑯᑕᑌᑭᓐ ᒦᓇ ᐁᑭᒋᓀᓐᑕᑯᑭᓐ ᐁᐑᒋᐏᑎᒪᑲᑭᓐ᙮ ᐁᐏᒋᐏᑎᒪᑲᑭᓐ ᐃᓂᐍᓂᐘᓐ ᑲᐃᔑ ᓂᐘᑭᓐ ᑲᔦ, ᑭᔥᐱᓐ ᐯᔑᒃ ᐁᑲ ᐁᒥᓄᓭᒃ ᑲᔦᒪ ᐁᑲ ᐁᓇᑲᒋᒋᑲᑌᒃ, ᒥᓯᐍ ᑲᐏᓐ ᑲᒥᓄᔭᓰᓐ᙮

***

ᑭᔥᐱᓐ ᒪᒥᑐᓀᓐᑕᒪᓐᒃ ᑲᑭᓇ ᑫᑯᓇᓐ ᑲᐱᒪᑎᓯᒪᑲᑭᓐ (ᑲᔦᒪ ᐱᒪᑎᓯᐏᓐ ᐃᓀᓐᑕᒪᓐ) ᐃᐦᐃᒪ ᑲᐃᔑᓂᔕᑭᓐ ᐍᒥᒋᑯᔑ ᒦᓇ ᐊᓂᔑᓇᐯ ᐃᑭᑐᐏᓐ, ᐊᓂᓐ ᑫᐃᔑᐘᐸᓐᑕᒪᒻᐸᓐ ᐘᐱᑯᓃ? ᑲᓇᑲᒋᑐᒥᓐ ᑲᐅᓴᐘᒃ ᐘᐱᑯᓃ᙮ ᐍᒥᒋᑯᔑᐏᓐ ᑫᐃᔑᑲᓇᐘᐸᓐᑕᓐᒃ, ᐁᐘᐱᑯᓃᐘᒃ ᐁᐃᓀᓐᒋᑲᑌᒃ ᑲ ᓄᒋᐦᐃᐍᒪᑲᒃ᙮ ᐃᓂᐍᓂᐘᓐ ᐅᒋᐱᑯᓐ ᐊᐸᒋᒋᑲᑌᐘᓐ ᑏᐘᐳᑲᓇᓐ ᒦᓇ ᒪᔥᑭᑭᓐ, ᐃᓂᐍᓂᐘᓐ ᑲᔦ ᐊᓂᐱᔕᓐ ᐊᐸᒋᒋᑲᑌᐘᓐ ᑎᐘᐳᑲᓐᒃ ᑲᔦᒪ ᒪᔥᑯᔑᐏᒥᒋᒥᑲᓐᒃ᙮ ᐃᐦᐃᐍ ᐘᐱᑯᓂ ᑲᐃᔑ ᐅᑎᑿᓂᐘᓐᒃ ᐅᓐᒋᐏᓯᓂᐘᒃ ᐊᒧᒃ ᒥᓇ ᐯᐯᐱᑯᒃ, ᒦᓇ ᑯᑕᑭᔭᒃ᙮ ᐁᓇᑲᑕᐍᓐᒋᑲᑌᒃ ᐅᓐᒋ ᓂᔓ ᐅᔥᑭᓐᔑᑯᓐᒃ ᑲᓇᐘᐱᐏᓐ, ᑲᓇᑲᑕᐍᓐᑕᒥᓐ ᐃᐦᐃᐍ ᐘᐱᑯᓂ ᓂᑕᒻ ᐁᐱᒪᑎᓯᒪᑲᒃ ᐁᑭ ᐊᓯᑎᓱᒡ ᐃᐦᐃᒪ ᐊᐦᑭᑲᓐᒃ ᑲᓂᓰᑿᑎᓂᒃ ᒦᓇ ᐁᐸᑭᑎᓂᑎᓱᒡ ᒋᐊᒧᑯᒡ ᒪᑿᓐ ᓂᑕᒻ ᑲᓂᐘᓂᔥᑲᓂᒡ ᒦᓇ ᐁᑲ ᒋᐱᒋᐳᐏᓭᒡ ᒋᑭᓰᓂᑎᓱᒡ ᐅᐑᔭᐏᓐᒃ ᒥᓂᑯᒃ ᐁᑲ ᑲᑮᐅᓐᒋ ᐑᓯᓂᒡ ᒥᒋᒥᓂ, ᐅᑲᓐᒋᐍᐱᔥᑲᓐ ᐅᒋᐱᑯᓐ ᐊᐘᔑᒣ ᐊᓇᒥᓐᒃ ᐁᐅᓐᒋ ᐏᑵᐸᐦᐊᓐᒃ ᒥᒋᒪᓐ, ᓂᐱᓂ, ᒦᓇ ᑫᐏᒋᐦᐃᑯᒡ ᐃᐦᐃᒪ ᑲᐃᔑᐱᒪᐱᑫᔑᓐᒃ ᒣᑿᒡ ᐁᐃᔥᐸᑌᓂᒃ ᐅᑎᑿᓐ ᐃᔥᐱᒥᓐᒃ ᐅᓐᒋ ᐊᒧᓐ, ᐁᓂᑯᓐ, ᒣᒣᓐᑵᓐ ᒦᓇ ᑯᑕᑭᔭᒃ ᒪᓂᒍᔕᒃ ᒋᐅᓐᒋ ᐏᓯᓂᐘᒡ ᒦᓇ ᒋᒥᓂᑵᐘᒡ ᐁᔑᐘᓂᒃ ᐅᓂᐱᒪᓐ ᒦᓇ ᒋᒪᒋᑕᒪᑲᒃ ᐁᓯᑿᒃ᙮ ᐃᑭᐍᓂᐘᒃ ᒪᓂᒍᔕᒃ ᐱᒥᓭᐘᒃ ᑲᔦᒪ ᐁᑭᐍᔥᑲᐘᒡ ᑲᐃᔑᑲᐯᔑᐘᒡ ᐁᐱᑐᐘᒡ ᑲᑭᒧᓐᔕᑭᓇᒧᐘᒡ ᒥᒋᒪᓐ ᒋᐏᓯᓂᐘᒡ ᑲᓂᒪᒋᑭᐘᒡ ᐅᑎᐯᓐᒋᑫᐏᓂᓐᒃ, ᒦᓇ ᑲᔦ, ᐅᓂᒐᓂᓯᐘᓐ᙮ᐃᓂᐍᓂᐘᓐ ᑲᐃᔑ ᓂᔕᑭᓐ ᑲᓇᐘᐸᓐᒋᑫᐏᓇᓐ, ᐃᐦᐃᐍ ᐘᐱᑿᓂ ᑫᑯᓐ ᐃᓇᐸᑕᓐ ᒦᓇ ᐁᓇᓐᑕᐍᓐᑕᑯᒃ ᐃᐦᐃᒪ ᐊᐦᑭᐏᓂᓐᒃ, ᔕᑯᒡ ᐃᐦᐃᐍ ᐃᓀᓐᑕᒧᐏᓐ ᐁᑯᓀᓐ ᐅᓐᒋ ᒦᓇ ᐁᔑᓇᐍᓂᒥᑎᒪᑲᑭᓐ ᑲᑭᓇ ᑲᐱᒪᑎᓯᒪᑲᑭᓐ ᐊᐦᐊᐍ ᐘᐱᑿᓂ ᒦᓇ ᑯᑕᑭᔭᓐ ᑫᑯᓇᓐ ᑲ ᐊᐸᒋᒋᑲᑌᓂᒃ ᐅᑕᓂᐱᔑᒪᓐ, ᐘᐱᑿᓂᓐ ᒥᓇ ᐅᐸᑿᓐᒋᓐ᙮

ᑯᑕᒃ ᐊᐍᒋᑲᓐ ᑲᔭᐸᒋᑐᓐ ᐅᓐᒋ ᐊᓯᓐ᙮ ᒣᑿᒡ ᐁᓂᐱᓐᒃ ᐅᔑᐱᐦᐃᑫᐏᓐ ᐊᓄᑭᐏᓐ ᐁᐏᒋᐘᔭᓐᒃ Defining Moments Canada,ᐊᓂᓐᑕ ᑲᑭᐅᓀᓂᒪᑲᓀᐘᒡ ᑭᑭᓄᒪᑫᒃ ᐁᑭᓯᓭᓂᒃ ᒋᐅᔑᑐᐘᒃ ᐃᓀᓐᑕᒧᐏᓇᓐ ᐊᓂᓐ ᑫᑭᔑᐱᑐᐘᒡ ᐊᓂᔑᓇᐯ ᑲᓇᐘᐸᓐᒋᑫᐏᓇᓐ ᐱᓐᑎᑲᒥᒃ ᑭᑭᓄᒪᑎᐏᑲᒥᑯᓐᒃ᙮ ᐯᔑᒃ ᑭᑭᓄᒪᑫᐏᓂᓂ, ᕃᓀ ᐊᓚᓐ, ᐅᑭᐅᔑᑐᓐ ᒋᑭᑐᒋᑲᑌᓂᒃ ᓂᔓ ᐅᔥᑭᓐᔑᒃ ᐘᐸᓐᒋᑫᐏᓐ ᐁᑭᐊᐸᒋᐦᐊᒡ ᐊᓯᓂᓐ᙮ ᐃᐦᐃᒪ ᐍᒥᒋᑯᔑ ᑭᑭᓄᒪᑫᐏᑲᒥᑯᓐᒃ, ᑭᔥᐱᓐ ᑭᑭᓄᒪᑫᐏᓂᓂ ᑲᑵᒋᒪᒡ ᑭᑭᓄᒪᐘᑲᓇᓐ ᒋᓇᑲᒋᐦᐊᓂᒡ ᐊᓯᓂᓐ, ᑲᓄᓐᑕᐘᒃ ᑫᒋ ᒋᔑᑕᔑᓐᒋᑫᐘᒡ ᐅᓐᒋ ᐊᓯᓂᑲᓇᓐ, ᑲᐃᔑᐊᐱᐘᒡ, ᑲᐃᔑᓇᑯᓯᓂᒡ, ᑫᒋᓐ ᑲᔦ ᑲᑭᔑᒥᑲᐏᒥᓐᒡ᙮ ᒥᐦᐅᐍ ᑲᔦ ᑭᒋᑭᑫᓐᒋᑫᐏᓐ᙮ ᐁᑯᑕᔥ ᑲᑕᑯᓇᒥᓐ ᒪᒥᑐᓀᓐᒋᑫᐏᓐ᙮ ᐊᓯᓂᒃ ᐍᔥᑲᒡ ᐅᐦᐅᒪ ᐅᓐᒋ ᐊᔭᐘᒃ ᒥᓂᑯᒃ ᑲᒪᒋᓂᓭᒃ ᐊᐦᑭᐏᓐ ᐯᔑᑯᓐ ᐁᐃᔑᓇᑯᓯᒡ᙮ ᑫᒋᓐ ᐁᑭ ᐃᔥᑯᑌᐏᒡ, ᐁᑭᐱᒥᐏᒋᑲᓱᒡ ᒣᑿᒡ ᑲᑭ ᑭᒋᑲᔥᑲᑎᓐᒃ, ᐁᑭ ᐸᑵᓭᐘᒡ ᒣᑿᒡ ᑭᒋᑲᒥᓐᒃ, ᒥᓇ ᐊᐘᔑᒣ ᑫᑯᓇᓐ᙮ ᐃᑭᐍᓂᐘᒃ ᐊᓯᓂᒃ ᐅᐱᒥᐏᑐᓇᐘ ᐅᑕᓇᓐᒃ ᑲᐱᓯᓭᒃ ᐊᐦᑭᐏᓐ, ᒦᓇ ᑭᔭᐸᒡ ᐁᒪᔥᑲᐏᐘᒡ ᒦᓇ ᑭᔭᐸᒡ ᐁᐱᒥᔭᐘᒡ ᒥᓂᑯᒃ ᑲᐅᓐᒋᐊᐦᑭᐘᓐᒃ, ᑲᔦ ᐃᐦᐃᐍ ᑲᐃᔑᓇᑯᓯᐘᒡ ᒦᓇ ᑲᐃᔑᐯᐸᑲᓂᓇᑯᓯᐘᒡ ᐁᑭ ᐊᔭᓐᒋᓭᒃ᙮ ᐅᐦᐅᐍ ᐃᓀᓐᒋᑫᐏᓐ ᐅᓐᒋᑭᑫᓐᒋᑲᑌ ᐱᒪᑎᓯᐏᓐ ᒦᓇ ᓴᑭᐦᐃᐍᐏᓐ ᐅᓐᒋ ᐁᒥᓌᔑᒃ ᑭᑐᑕᓇᒥᓇᓐ᙮ ᕃᓀ ᐅᑭ ᐊᓂᐏᓐᑕᓐ ᐅᐍᓂ ᑲᐃᔑᐘᐸᓐᑕᓐᒃ ᐁᒥᑵᓐᒋᑲᑌᒃ/ᐊᒐᑯᐏ ᑭᑫᓐᒋᑫᐏᓐ᙮ ᐊᓯᓂᒃ ᐅᐱᒥᐏᑐᓇᐘ ᐅᑕᓇᓐᒃ ᒦᓇ ᐁᑯᓯᑯᑭᓐ᙮ ᑭᔥᐱᓐ ᐊᓯᓂᒃ ᐁᐊᐸᒋᐦᐊᑲᓀᐘᒡ ᒋᐅᓐᒋ ᑭᑫᓐᒋᑲᑌᒃ ᒋᓂᓯᑐᒋᑲᑌᑭᓐ ᐊᓂᒥᓭᐏᓇᓐ, ᑯᑕᒋᐏᓐ, ᑲᔥᑫᓂᒧᐏᓐ ᑲᔦᒪ ᑯᑕᑭᔭᓐ ᑲᑯᓯᑯᑭᓐ ᐃᓀᓐᑕᒧᐏᓇᓐ, ᑕᓂᑯᓯᑵᑕᑯᓐ ᐏᐸᒡ᙮ ᑲᑭᓇ ᐊᐏᔭ ᐅᑕᔭᐘᓐ “ᐊᓯᓂᓐ” ᑲᐱᒥᐏᓇᒡ, ᔕᑯᒡ ᐊᓂᓐᑕ ᐊᐘᔑᒣ ᐅᐱᒥᐏᓇᐘᓐ᙮ ᑭᔥᐱᓐ ᐃᔑ ᒪᒪᐏᑲᓐᑕᒪᓐᒃ ᒋᐏᒋᑐᔭᓐᒃ ᐃᐦᐃᐍ ᑲᐃᔑᑯᓯᑯᒃ ᐊᓯᓂᒃ ᒋᓯᓭᒃ ᑲᑭᓇ ᐊᐏᔭ ᐸᓐᑭ ᒋᑭᐱᒥᐏᓇᒡ ᑲᑯᓯᑯᑭᓐ? ᐊᓯᓐ ᑲᐃᔑᓇᑯᓯᒡ ᒋᑭᐱᓇᐦᐅᒡ ᑭᐱᓐᑕᓱᓂᓐᒃ ᒦᓇ ᐁᑲ ᒋᐘᐸᒪᑲᓀᒡ? ᑭᔥᐱᓐ 40 ᐊᐏᔭᒃ ᐅᑕᐱᓇᐘᒡ ᐃᓂᐍᓂᐘᓐ ᐊᓯᓂᓐ ᒋᐅᑕᐱᓇᒪᐘᒡ ᐃᓂᐍᓂᐘᓐ ᐊᐏᔭᓐ ᑲᑯᓯᑯ ᐱᒥᐏᒋᑫᓂᒡ, ᒋᑭᑲᔥᑭᐦᐅᓇᓂᐘᓐᒃ ᑭᔥᐱᓐ ᐃᓯᓭᒃ ᐃᐦᐃᐍ? ᒦᓇ ᐊᓂᓐ ᑫᑭᓯᓭᐘᒡ ᐃᑭᐍᓂᐘᓐᒃ ᐊᐏᔭᒃ ᒋᑭᐅᓐᒋ ᒥᓄᔭᐘᒡ ᐊᐏᔭᒃ?

ᐁᓇᑲᑕᐍᓐᒋᑲᑌᒃ ᑲᐃᓇᑌᒃ ᑌᐻᐏᓐ ᒦᓇ ᒪᒥᓄᒋᑫᐏᓐ, ᑭᔥᐱᓐ ᑲᑭᓇ ᐊᐏᔭ ᐅᒪ ᑲᓇᑕ ᐃᓂᓂᐘᒃ ᑐᑕᒧᐘᒡ ᐁᐊᑲᓭᓐᑕᑯᒃ, ᑲᓇᑫ ᐯᔑᒃ ᑫᑯᓐ, ᑲᑭ ᑲᔥᑭᑐᒥᓐ ᒋᑭᐊᓄᑭᑕᒪᓐᑭᓐ ᐃᓂᐍᓂᐘᓐ ᑲᑯᓯᑯᑭᓐ ᑭᑐᑕᓇᒥᓇᓐ ᑲᑭ ᐅᓐᒋ ᐅᔑᒋᑲᑌᒃ ᐅᐦᐅᐍ ᐊᐦᑭ ᑲᐃᔑ ᑕᔭᓐᒃ ᓄᑯᒻ ᑲᑭᔑᑲᒃ᙮ ᒥᐦᐅᐍ ᐁᐃᒋᑲᑌᒃ ᒋᑭᒋᑯᓇᒪᓐᑭᓐ ᐃᓂᐍᓂᐘᓐ ᑭᑕᑯᒐᐸᐱᓱᓇᓐ ᒦᓇ ᒋᐘᐸᓐᑕᒪᓐᑭᓐ ᐃᓂᐍᓂᐘᓐ ᑌᐻ ᑲᐃᓇᒋᑲᑌᑭᓐ, ᑲᔦᒪ ᒋᓇᑲᑕᐍᓐᑕᒪᓐᒃ ᑲᐃᔑᔭᔭᓐᒃ ᒦᓇ ᒋᑭᑫᓐᑕᒪᓐᑭᓐ ᐸᑲᓐ ᐘᐸᓐᒋᑫᐏᓐ, ᑭᔥᐱᓐ ᑲᔦ ᐁᑲ ᐁᐃᔑᔭᔭᓐ ᑲᔦᒪ ᐁᑭᑫᓐᑕᒪᓐ ᒋᑭᑐᑕᒪᓐ ᑫᑭᓐ᙮ ᑭᔥᐱᓐ ᐃᔑ ᐅᓀᓐᑕᒪᓐ ᐁᑲ ᒋᑐᑕᒪᓐ ᑲᑭᐏᒋᑐᓐ ᐃᐦᐃᐍ “ᑿᔭᒃ ᐲᐏᑌᑲᓐ” (Dion, 2007) ᐃᔑᑲᐸᐏᐏᓐ — ᒥᐦᐅᐍ ᐊᐏᔭ ᑲᐃᔑᐅᓀᓐᑕᓐᒃ ᐁᑲ ᐁᐏᑭᑫᓐᑕᓐᒃ ᑲᔦᒪ ᒋᐘᐸᓐᑕᓐᒃ ᐸᑲᓐ ᐃᔑᑲᐸᐏᐏᓐ ᐁᑲ ᒋᐸᐸᒣᓐᑕᓐᒃ ᐸᑲᓐ ᐘᐸᓐᒋᑫᐏᓐ᙮

***

ᒥᐅᐦᐅᐍ ᑯᑕᒃ ᑲᓇᐘᐸᓐᒋᑫᐏᓐ ᒋᑭ ᐊᔭᔭᓐᒃ ᒥᓯᐍ ᑲᓇᐘᐸᓐᒋᑫᐏᓐ ᒋᑭᐏᒋᐦᐃᑯᔭᓐᒃ ᑲᐱᒥᔭᔭᓐᒃ, ᒋᑭᒋᐏᓇᒪᓐᒃ ᐁᐅᔑᑐᔭᓐᒃ, ᐁᑲ ᒋᒪᒋᑲᒪᑲᒃ, ᐃᐦᐃᐍ ᑭᑫᓐᒋᑫᐏᓐ ᒋᔑᑲᓇᐘᐸᓐᒋᑲᑌᑭᓐ ᑭᒋᓀᓐᒋᑫᐏᓂᓐᒃ ᒦᓇ ᑲᓇᒋᒋᑫᐏᓐ ᑲᐃᔑᐯᔑᑯᓇᓂᐘᓐᒃ ᒣᒣᔾᑭᔭᐏᓇᓐ ᒦᓇ ᒪᔥᑲᐏᓯᐏᓇᓐ᙮ ᑭᔥᐱᓐ ᑐᑕᒪᓐ ᑭᑫᓐᒋᑫᐏᓐ, ᒋᐘᐸᓐᒋᑫᔭᓐ, ᒦᓇ ᓇᓇᓐᑕᐘᐸᓐᑕᒪᓐ ᓂᓯᑐᑕᒧᐏᓐ, ᐊᓂᓐ ᐁᓐᑐᒋᑲᑌᒃ ᐅᐦᐅᐍ ᒋᑭᔑᒋᑲᑌᒃ? ᐅᐦᐅᐍ ᑲᐃᑭᑦ ᑌᐻ – ᑲᐏᓐ ᑫᑯᓐ ᐅᓐᒋ ᓂᓇᐏᓐᑦ ᐁᑲ ᒋᐏᒋᑐᑕᓐᒃ ᓂᓇᐏᓐᑦ ᐅᓐᒋ᙮ ᑲᐏᓐ ᑲᑭᑐᑕᓐᓯᓐ “ᑯᑯᓪ” ᐱᐘᐱᑯᓐᒃ ᑲᔦᒪ ᒋᒧᒋ ᐊᑭᓐᑕᒪᓐ ᐅᓐᒋ ᐊᓂᔑᓇᐯ ᐃᓇᑲᓀᓯᐏᓐ ᒦᓇ ᒋᓇᑲᒋᑐᔭᓐ᙮ ᐅᐦᐅᐍ ᑲᐃᓇᑲᓀᓯᔭᓐᒃ ᐱᒥᑭᑫᓐᒋᑲᓂᐘᓐ ᒦᓇ ᐁᑐᒋᑲᑌᑭᓐ ᒣᑿᒡ ᐊᓂᔑᓇᐯ ᐃᓇᑲᓀᐏᓇᓐ ᑐᑕᒧᐏᓐ ᒋᑭ ᒥᓯᐍ ᓂᓯᑐᑕᒪᓐ ᐃᐦᐃᐍ ᑲᐃᔑᒥᑭᐍᓇᓂᐘᓐᒃ ᐘᐸᓐᒋᑫᐏᓇᓐ, ᑲᐃᓯᓭᒃ ᐃᓇᑎᓯᐏᓐ, ᑐᑕᒧᐏᓇᓐ, ᑲᔦᒪ ᑲᔦᒪ ᑲᔦᒪ ᙮᙮᙮

ᒦᓇ ᐅᐦᐅᐍ ᑯᑕᒃ ᐃᔑᐏᒋᐦᐃᐍᓭ ᑲᑲᓇᐘᐸᓐᒋᑲᑌᒃ ᐁᐃᔑᓇᑲᒋᒋᑲᑌᒃ ᒋᑕᐱᔥᑯᒋᓭᒃ ᑲᓇᓐᑕᐍᓐᑕᑯᒃ ᐃᐦᐃᒪ ᐊᒐᑯᐏᓐ, ᒥᑐᓀᓐᒋᑲᓐ, ᐃᓀᓐᑕᒧᐏᓐ ᒦᓇ ᐏᔭᐤ ᑲᓇᓐᑕᐍᓐᒋᑲᑌᒃ ᐊᐏᔭ ᑲᑐᑕᑭᓐ ᑭᑫᓐᒋᑫᐏᓇᓐ᙮ ᐅᐦᐅᐍ ᑭᑫᓐᒋᑫᐏᓐ ᒦᓇ ᓂᓯᑐᑕᒧᐏᓐ ᑲᑭ ᐅᓐᑎᓀᓐ ᒥᓯᐍ ᑭᑫᓐᑕᒧᐏᓐ ᐅᓐᒋ ᐊᐏᔭ ᐁᑭᑭᓄᒪᐏᒃ ᐁᐱᒥᐏᑐᒋᓐ ᐃᓂᐍᓂᐘᓐ ᑭᑫᓐᑕᒧᐏᓇᓐ ᐁᑭᒥᓇᑲᓀᒡ᙮ ᑭᔥᐱᓐ ᐁᐏᑭᑫᓐᑕᒪᓐ ᑯᑕᒃ ᐊᐏᔭ ᑲᑎᐯᓐᑕᓐᒃ ᑯᑕᑭᓂ ᐊᓂᔑᓇᐯ ᐃᓇᑲᓀᓯᐏᓐ, ᒪᐘᒡ ᑭᒋᓀᓐᑕᑯᓐ ᐊᐃ ᐊᐸᒋᐦᐊᒡ ᐃᑭᐍᓂᐘᒃ ᑲᐃᔑ ᑭᑫᓐᒋᑫᐘᒡ ᑲᓇᓇᓐᑕᐘᐸᓐᑕᒪᓐ ᐃᐦᐃᐍ ᑭᑫᓐᒋᑫᐏᓐ᙮ ᒥᐦᐅᐍ ᑲᔦ ᐁᐃᑭᑐᓇᓂᐘᓐᒃ ᒋᓂᓯᑐᑕᒪᓐ ᐁᑲ ᑲᑭᓇ ᐊᓂᔑᓇᐯ ᐃᓇᑲᓀᓯᐏᓇᓐ ᒪᔭᒻ ᒋᓇᑌᑭᓐ ᑲᐃᔑᑌᐻᑕᒧᐘᒡ ᑲᐃᓇᑌᓂᒃ, ᒦᓇ ᑲᔦ ᐃᐦᐃᒪ ᑕᔑᑫᐏᓂᓐᒃ, ᐃᐦᐃᐍᓂᐘᒃ ᐊᓂᔑᓇᐯᒃ ᑕᔑᑫᐏᓂᓐᒃ ᐁᑲ ᐯᔑᑯᓐ ᐁᔑᑌᐻᑕᒧᐘᒡ, ᑲᔦᒪ ᐁᑲ ᐯᔑᑯᓐ ᑭᑫᓐᒋᑫᐏᓐ ᐁᐱᒥᐏᑐᐘᒡ᙮ ᒪᐘᒡ ᐃᔅᐸᑌ ᐁᑭᒋᓀᓐᑕᑯᒃ ᒋᓇᓐᓯᑲᐘᒡ ᐃᐦᐃᒪ ᑕᔑᑫᐏᓂᓐᒃ ᐁᐏᒋᐘᒡ ᐃᐦᐃᒪ ᐊᐦᑭᐏᓂᓐᒃ ᒋᑭᓯᓭᒃ ᒋᑭᑲᑵᑌᔭᓐ ᑭᑫᓐᒋᑫᐏᓐ ᑲᐃᓇᑌᒃ ᐃᐦᐃᒪ ᑲᐃᔑᐊᐱᐘᒡ᙮ ᑲᔦ, ᑭᒋᓀᓐᑕᑯᓐ ᒋᑭᑫᓐᑕᒪᓐ ᐃᑭᐍᓂᐘᒃ ᐊᓂᔑᓇᐯᒃ ᐁᑲ ᐁᐯᔑᑯᒃ ᑌᐻᑕᒧᐏᓇᓐ ᒦᓇ ᑭᑫᓐᒋᑫᐏᓇᓐ, ᔕᑯᒡ ᐃᑭᐍᓂᐘᒃ ᐊᓂᔑᓇᐯᒃ ᑲᐏᓐ ᐅᐱᒥᐏᑐᓯᓇᐘ ᐯᔑᑯᓐ ᑭᑫᓐᒋᑫᐏᓐ᙮ ᐯᔑᒃ ᐊᐏᔭ ᑲᐏᓐ ᐃᓯᓭᓯᓐ ᑲᑭᓇ ᑫᑯᓐ ᒋᑭᑭᑫᓐᑕᓐᒃ, ᑲᐃᓇᑌᑭᓐ ᑲᑭᓇ ᐃᓇᑲᓀᓯᐏᓇᓐ᙮ ᐸᑭᑎᓇᒥᓐ ᐃᐦᐃᒪ ᑕᔑᑫᐏᓂᓐᒃ ᒋᐏᓇᐘᒡ ᐊᐏᔭᓐ ᑫᑭ ᐏᒋᐦᐃᒃ, ᒦᓇ ᒋᐅᑕᐱᓇᒪᓐ ᐁᑲ ᑭᓯᓭᒃ, ᐁᑲ ᒋᒥᑲᒪᓐ ᑲᓇᓇᓐᑕᐘᐸᓐᑕᒪᓐ᙮ ᑭᔥᐱᓐ ᐃᓯᓭᒃ, ᑭᒋᓀᓐᑕᑯᓐ ᒋᐅᑕᐱᓇᒪᓐ, ᒦᓇ ᒋᓇᑲᑕᐍᓐᑕᒪᓐ ᐸᑲᓐ ᑫᐃᔑᒪᒐᔭᓐ ᐃᐦᐃᐍ ᑲᐏᑭᑫᓐᑕᒪᓐ᙮

ᑭᔥᐱᓐ ᒦᓇ ᐊᐱ ᑭᑫᓂᒪᒡ ᐊᐏᔭ ᑲᔦᒪ ᐊᐏᔭᒃ ᑫᐏᒋᐦᐃᑿ ᑭᐱᒥᔭᐏᓂᓐᒃ ᐅᓐᒋ ᑭᑫᓐᒋᑫᐏᓐ, ᐊᓂᓐ ᐁᔑᐏᑕᓄᑭᒪᒡ ᒋᐏᒋᐦᐃᑿ ᒋᑭᑫᓐᒋᑫᔭᓐ ᒦᓇ ᒋᒪᒐᔭᓐ ᓂᑲᓐ ᑭᑭᑫᓐᒋᑫᐏᓂᓐᒃ? ᑭᒋᓀᓐᑕᑯᓐ ᒋᑲᑵᑌᔭᓐ ᐏᐊᐸᒋᑐᔭᓐ ᑲᑭ ᑭᑭᓄᒪᑯᔭᓐ, ᑲᔦᒪ ᐃᔑᒥᓄᓭᐁᒃ ᐊᐦᐊᐍ ᑲᑭᑭᑭᓄᒪᐏᒃ ᒋᑭᐏᒋᐦᐃᒃ ᒋᑭᑭᓄᒪᑫᔭᓐ ᑲᔦᒪ ᒋᑭᑭᓄᒪᐘᒡ ᐸᑲᓐ ᐊᐏᔭᓐ᙮ ᐁᐊᐸᒋᒋᑲᑌᑭᓐ ᐏᓐᑕᒪᑫᐏᓇᓐ, ᑭᑫᓐᒋᑫᐏᓐ ᑲᔦᒪ ᑭᑭᓄᒪᑫᐏᓐ ᐁᑲ ᐁᐸᑭᑎᓂᑯᔭᓐ ᒋᑭᑐᑕᒪᓐ ᐃᔑᐘᐸᓐᒋᑲᑌ ᐁᒪᓐᔑᑐᑕᒪᓐ᙮ ᑲᐯᐦᐃ ᐃᔑᑭᑫᓐᑕᓐ ᐁᐸᔭᑌᐏᓐᑕᒪᑯᔭᓐ ᐃᐦᐃᐍ ᑭᑫᓐᒋᑫᐏᓐ ᑲᒥᓂᑯᔭᓐ ᐁᐸᑭᑎᓂᑲᑌᒃ ᒋᑭᓇᑲᒋᑐᔭᓐ ᐁᑲ ᒋᓇᑭᓐᑌᒃ ᐁᒪᓐᔑᑐᑕᒪᓐ ᒦᓇ/ᑲᔦᒪ ᐁᐊᐸᒋᑐᔭᓐ ᑭᑫᓐᒋᑫᐏᓐ ᐁᒪᓯᓭᑐᔭᓐ᙮

ᑫᓃᓐ ᑭᐱᐅᑕᐱᓂᑯ ᐊᐘᔑᔑᐏᑭᒪ ᒣᑿᒡ 60s ᐊᐦᑭᐏᓇᓐ᙮ ᐁᔥᑲᒻ ᑲᑵᒋᒥᑯ ᒋᑭᐏᓐᑕᒪᓐ ᑎᐸᒋᒧᐏᓐ, ᑲᔦᒪ ᒋᐏᑕᓄᑭᒪᑿ ᑭᑭᓄᒪᑫᒃ ᒋᑎᐸᒋᒧᑕᐘᑿ ᑲᑭᑭᓄᒪᐘᒡ ᐊᐘᔑᔕᓐ᙮ ᒥᔑᓐ ᐊᐏᔭᒃ ᑲᑭ ᐱᔕᐳᔥᑲᒧᐘᒡ ᐍᒥᒋᑯᔑᐏᑐᑕᒧᐏᓇᓐ ᑎᓄᑲᓐ ᐍᔥᑲᒡ ᑭᑭᓄᒪᑫᐏᓇᓐ ᑲᑵᒋᒪᐘᒃ ᒋᐏᓐᑕᒧᐘᒡ ᐅᑎᐸᒋᒧᐏᓂᐘ᙮ ᒥᐍ ᒋᐊᓂᐏᓐᑕᒪᓐ ᑯᑕᒃ ᑲᑲᓇᐘᐸᓐᒋᑲᑌᒃ ᐅᓐᒋ ᑭᓇᐏᓐᑦ/ᑮᓐ ᑲᐅᓇᑕᒻᓯᔅ ᑫᐃᓇᑌᒃ ᑭᑕᓐᑿᒥᓯᐏᓐ ᒋᓇᑲᒋᐦᐊᑢ ᐃᓂᐍᓂᐘᒃ ᐊᐏᔭᒃ ᑫᑎᐸᒋᒧᑕᐘᒡ ᑲᔦᒪ ᑲᑲᑵᒋᒥᑿ ᒋᑎᐸᒋᒧᔭᓐ᙮ ᑭᔥᐱᓐ ᐊᐏᔭ ᑲᑵᒋᒪᒡ ᐁᐊᔭᒡ ᐅᑎᐸᒋᒧᐏᓐ ᑲᔦᒪ ᐅᑭᑫᓐᒋᑫᐏᓐ ᒋᑭᐏᓐᑕᓐᒃ ᐁᓴᓇᑲᑎᓂᒃ, ᑭᒋᓀᓐᑕᑯᓐ ᐁᑲ ᒋᐊᔓᐍᓐᑕᒪᓐ ᑲᐃᔑᑎᐸᒋᒧᒡ, ᒦᓇ ᒋᐸᑭᑎᓇᒡ ᐊᐏᔭ ᑫᐃᔑᐊᐱᒡ ᒦᓇ ᒋᓴᑲᐦᐊᓐᒃ ᐁᑲ ᑭᔥᐱᓐ ᑭᑐᑕᓐᒃ᙮ ᑲᔦ ᓇᑲᒋᑐᓐ ᐃᑭᐍᓂᐘᒃ ᐊᐏᔭᒃ ᑲᑎᐸᒋᒧᑕᐘᒡ: ᑭᔥᐱᓐ ᑎᐸᒋᒧᔭᓐ ᐃᑭᐍᓂᐘᒃ ᐊᐘᔑᔕᒃ ᑲᑭᑭᓄᒪᐘᑲᓀᐘᒡ, ᑕᐃᓯᓭ ᑫᑯᓐ ᒋᐅᓐᒋᔑᔭᐘᒡ ᑲᐱᓯᓐᑕᐏᑿ? ᐅᑭᑫᓐᑕᓇᐘᓇ ᑫᑐᑕᒧᐘᒡ ᒦᓇ ᒋᓇᓐᓯᑲᒧᐘᒡ ᐏᒋᐦᐃᐍᐏᓇᓐ ᑲᔦᒪ ᐊᓐᑿᒥᓯᐏᓐ ᑭᔥᐱᓐ ᐅᓐᒋᑭᒋᒪᒉᓐᑕᓐᒃ ᐃᐦᐃᐍ ᐃᓇᒋᒧᐏᓐ ᐅᓐᒋ? ᑭᑭᐸᔭᑌᐏᓐᑕᓐ ᓇ ᐁᑯᓀᓐ ᐃᐦᐃᐍ ᑲᐏ ᑕᔑᓐᒋᑲᑌᒃ ᓂᑲᓐ ᒋᑭᐅᓀᓐᑕᒧᐘᒡ ᑭᔥᐱᓐ ᐏᐱᓯᓐᑕᒧᐘᒡ ᐁᑭᑫᓐᑕᒧᐘᒡ ᒋᓴᓇᑫᓐᑕᒧᐘᒡ? ᐊᓂᓐ ᐅᐦᐅᐍ ᐍᓐᒋᑭᑫᓐᑕᒪᓐ? ᑭᑫᓂᒥᒃ ᑲᐱᓯᓐᑕᐏᑿ, ᑲᐏᓐ ᓂᑲᓐ ᐃᓀᓐᑕᑫᓐ ᑭᔥᐱᓐ ᑲᔦᒪ ᐁᑲ ᑌᐻ ᑭᑫᓐᑕᒪᓐ ᑫᐃᔑᔭᐘᒡ᙮

***

ᐅᐦᐅᒪ ᑲᐃᔑᐏᓐᑕᒪᓐ, ᑭᑭᓇᑲᒋᑐᒥᓐ ᐊᓂᓐᑕ ᐃᓂᐍᓂᐘᓐ ᓇᐸᐸᓐᒋᑲᓇᓐ ᑲᑲᓇᐘᐸᓐᒋᑲᑌᑭᓐ ᐅᓐᒋ ᐁᑢᑉᒪᓐᒃ (ᓂᔓ ᐅᔥᑭᓐᔑᒃ ᐘᐱᐏᓐ) ᑲᐃᔑᓇᐦᐁᓐᑕᒪᓐ ᒋᑭᐏᓐᑕᒪᓐ᙮ ᑲᑭᓇ ᐊᐏᔭ ᑲ ᐊᔭᒡ, ᑲᐏᓐ ᓂᓇᑲᒋᓯᓐ ᐅᓄᐍᓂᐘᓐ ᑲᑲᓇᑲᒋᒋᑲᓂᐘᓐᑭᓐ ᒦᓇ ᑭᑲᓄᑕᓇᓐ ᐃᓂᐍᓂᐘᓐ ᑲᐃᓀᓐᑕᒪᓐ ᐁᔑᓇᐦᐁᓐᑕᒪᓐ ᒋᑭᑭᑐᔭᓐ᙮ ᐅᓐᒋ ᑭᑫᓐᑕᒧᒃ ᑯᑕᑭᔭᒃ ᐊᐏᔭᒃ ᐅᑕᔭᓇᐘ ᐊᐘᔑᒣ ᐅᓄᐍᓂᐘᓐ ᐅᓐᒋ ᑲᑲᓇᐘᐸᓐᒋᑲᑌᑭᓐ ᒦᓇ ᐯᐸᑲᓐ ᐁᔑᐘᐸᓐᑕᒧᐘᒡ ᐅᓐᒋ ᑲᐅᓐᒋᐘᒡ, ᑲᐃᓇᒋᑫᐘᒡ, ᒦᓇ ᑲᑭᔑ ᑭᑭᓄᒪᐘᑲᓀᐘᒡ ᑲᐱᒥ ᐱᒪᑎᓯᐘᒡ, ᑭᑫᓐᒋᑫᐏᓐ ᒦᓇ ᑭᑭᓄᒪᑫᐏᓇᓐ᙮ ᐅᐦᐅᐍ ᑫᒋᓐ ᐃᓯᓭᑐᒃ ᐁᐘᓂᔥᑵᐍᓭᒃ ᒦᓇ ᒋᓯᓭᒃ ᐁᑲ ᐊᐏᔭ ᒋᐏᑭᑫᓐᑕᑭᓐ᙮ ᑭᐏᓐᑕᒪᐏᓂᐘ ᒋᐱᒥᔭᔦᒃ ᑭᑭᑭᓄᒪᑯᐏᓐ ᒦᓇ ᑭᓂᓯᑐᑕᒧᐏᓐ ᒣᑿ ᐁᐱᒥᐏᑐᔭᓐ ᐘᓂᔥᑵᐍᓐᑕᒧᐏᓐ᙮ ᑲᐏᑭᑫᓐᒋᑲᑌᒃ ᑫᑯᓐ ᐃᓯᓭ ᒋᐊᐸᒋᑐᔭᓐ ᑎᐸᐦᐃᑲᓐ, ᐱᐦᐅᐏᓐ ᒦᓇ ᓇᓇᓐᑐᑭᑫᓐᒋᑫᐏᓐ — ᑲᐏᓐ ᐅᐦᐅᐍ ᒋᒣᔾᑭᓭᒃ᙮ ᑲᒥᓌᔑᒃ ᑭᑫᓐᒋᑫᐏᓐ ᓇᓐᑕᐍᓐᑕᑯᓄᓐ ᐏᒋᑐᐏᓇᓐ ᐅᓐᒋ ᐯᔑᑯᓐ ᑫᑯᓐ, ᑎᐸᐦᐃᑲᓐ, ᐃᓀᓐᒋᑫᐏᓐ ᐁᑐᒋᑲᑌᒃ, ᐁᐘᓂᓭᑭᓐ ᑭᑫᓐᒋᑫᐏᓇᓐ, ᒥ’ᓇ ᒋᑭᑐᑕᒪᓂᓐ ᑲᑵᑌᐏᓇᓐ᙮ ᒥᑵᒡ ᑭᑎᓂᓐ ᐅᐦᐅᐍ ᑲᐃᔑ ᐅᑕᐱᓇᒪᓐ ᑭᑫᓐᒋᑫᐏᓐ ᒋᐅᓐᒋᓯᓭᒃ ᐃᑭᐍᓂᐘᒃ ᑫᓂ ᐊᓂᑯ ᐱᒪᑎᓯᐘᒡ ᒋᐅᔥᑭᓭᑭᓐ ᓂᓯᑐᑕᒧᐏᓐ᙮

ᑭᑭᓄᒪᑫᐏᓇᓐᑲᐃᓯᓴᑭᓭᑭᓐ

ᐊᓂᓐ ᑫᑐᑕᒪᓐᒃ ᒋᑭᓴᑭᓭᑭᓐ ᐅᓄᐍᓂᐘᓐ ᒥᓯᐍ ᐊᐦᑭᐏᓂᓐᒃ? ᐊᓂᓐ ᑫᑭᑐᑕᒪᓐ ᑲᐃᔑᐯᔑᑯᔭᓐ ᐅᐦᐅᐍ ᐊᓄᑭᐏᓐ? ᐸᑭᑎᓂᑎᓱᓐ ᒋᒥᓂᑎᓱᔭᓐ ᑎᐸᐦᐃᑲᓐ, ᐱᐦᐅᐏᓐ ᒦᓇ ᓴᑭᐦᐃᐍᐏᓐ ᒋᑭᑭᓄᒪᑯᔭᓐ ᑫᓂᔕᔭᓐ ᐅᐦᐅᐍ ᑭᑫᓐᒋᑫᐏᓐ᙮ ᑭᑫᓐᑕᓐ ᒋᐘᓂᑐᑕᒪᓐ, ᒦᓇ ᒋᑲᔥᑭᑐᔭᓐ ᒋᓂᑎᓱᔭᓐ ᐁᒪᒉᓐᑕᒪᓐ ᒦᓇ ᒋᐳᓀᓂᒥᑎᓱᔭᓐ᙮ ᐅᐦᐅᐍ ᐱᒥᔭᐏᓐ ᑭᑫᓐᒋᑫᐏᓐ ᐅᓐᒋ ᑲᐏᓐ ᐏᐸᒡ ᑕᐃᓯᓭᓯᓐ ᒦᓇ ᒋᑕᐏᓭᒃ ᒦᓇ ᐏᒋᐏᑎᐏᓇᓐ᙮ ᐏᒋᐏᑎᐏᓐ ᐅᓐᒋ ᐊᐦᑭᐏᓇᓐ, ᐊᐏᔭᒃ ᒦᓇ ᑲᐃᔑ ᐯᔑᑯᔭᓐ᙮ ᑲᓇᑲᓂᓇᐘ ᐅᐦᐅᐍ ᓂᑲᒧᐏᓐ ᑲᑭ ᐅᔑᐱᐦᐊᒪᓐ ᓂᐱᓄᓐᒃ ᒋᓇᑲᑕᐍᓐᑕᒣᒃ ᒦᓇ ᒋᑭᑭᓄᒪᑯᔦᒃ ᑭᐱᒥᔭᐏᓂᐘ᙮